वैशाख १७ – रियल मड्रिडका स्ट्राइकर क्रिष्टियानो रोनाल्डो युरोपका शीर्ष ६ लिगमा सर्वाधिक गोल गर्ने खेलाडी बनेका छन् ।
रोनाल्डोले आफ्नो खेल जीवनमा अहिलेसम्म पोर्चुगलको प्रिमियरा लिगा, इंग्लिस प्रिमियर लिग र ला लिगा गरी ३ सय ६७ लिग गोल गरेका छन् । योसँगै उनी युरोपका शीर्ष ६ लिगमा अहिलेसम्मकै धेरै गोल गर्ने खेलाडी बनेका हुन् ।

रोनाल्डो र मार्सेलोको गोलमा रियल मड्रिडले जित्यो, उपाधि होडमा अर्को कदम

उनी इंग्ल्याण्डको प्रिमियर लिग, स्पेनको ला लिगा, इटालीको सिरी ए, जर्मनीको बुण्डेस लिगा, फ्रान्सको लिग वान र पोर्चुगलको प्रिमियरा लिगामा खेल्ने खेलाडी मध्ये सबै भन्दा धेरै गोल गर्ने खेलाडी बनेका हुन् ।
ला लिगा अन्तर्गत शनिबार राति भएको भ्यालेन्सियासँगको खेलमा २७ औं मिनेटमा रोनाल्डोले गरेको गोल ला लिगामा यो सिजन उनले गरेको २० औं तथा समग्र लिगमा गरेको तीन सय ६७ औं गोल हो । रोनाल्डोले इंग्ल्याण्ड तथा टोटनह्यामका स्ट्राइकर जिम्मी ग्रेएवेसले बनाएको कीर्तिमान भंग गरेका हुन् । जिम्मीले सन् १९५७ देखि १९७१ को बिचमा टोटनह्याम, चेल्सी, एसी मिलान, वेष्ट ह्यामबाट गरी पाँच सय २८ खेलमा तीन सय ६६ गोल गरेर कीर्तिमान बनाएका थिए ।
रोनाल्डोले म्यानचेस्टर युनाइटेड र रियल मड्रिडबाट गरी ४ सय ८३ खेलमा तीन सय ६७ गोल गरेर युरोपका शीर्ष ६ लिगमा सर्वाधिक गोल गर्ने खेलाडीको कीर्तिमान बनाएका हुन् ।
उनले प्रिमियरा लिगामा स्पोर्टिङ सिटीका लागि तीन, प्रिमियर लिगमा म्यानचेस्टर युनाइटेडबाट ८४ तथा ला लिगामा रियल मड्रिडबाट दुई सय ८० गरी समग्रमा तीन सय ६७ लिग गोल गरेका हुन् ।
शनिबार रातिको खेलमा पहिलो हाफमा गोल गर्दै कीर्तिमान बनाएका रोनाल्डोले दोस्रो हाफमा पाएको पेनाल्टीमा भने गोल गर्न सकेका थिएनन् ।

LEAVE A REPLY